حاجات الشباب الأساسية

 

 مدح صاحبتك عند جوزك نتيجته نهايتك !

انا شاب اتجوزت الانسانة اللي قلبي اختارها وهي بنت عمي وربنا اكرمنا ورزقنا بولد

 جميل ربي يبارك لي فيه وحياتنا كانت جميلة الحمدلله لدرجة اني من ساعة ما اتجوزتها

 مش فاكر من اننا نمنا انا وهي واحنا زعلانين لكن كان عند مراتي بنت عمها وصديقتها

 القريبة منها جدآ بتحبها بتخلص لها وبتعتبرها زي اختها وكانت متزوجة ، ويتفقوا ان

 لازم يتجمعوا كل اسبوع اما عندها او عند مراتي وفجأة سمعنا خبر طلاقها وحست

 مراتي بحزن شديد كأنها هي اللي اتطلقت ولما سألتها انت ليه حزينة بالشكل ده كانت

 بتزعل مني اوي وفضلت طول ما هي قاعدة كانت تحكي وتتكلم عن جمالها وعن اخلاقها

 وعن اولادها وتقولي ليه بس هي اتطلقت وفضلت تمدح فيها طول الوقت مع اني كنت

 بشوفها شكلها عادي جدآ مش عارف ليه للدرجة دي مراتي بتمدحها وكأنها ملاك ماشي

 على الارض وفضلت شاغلة دماغها وقت طويل بتاع صديقتها اللي اتطلقت بالرغم انها

 تعبانة وفي شهور الحمل الاخيرة كانت مراتي تعمل المستحيل عشان تسعدها وترسم

 الضحكة على وشها وتعزمها عندنا كتير او تعزمها في مطعم وزاد وجودها بالبيت ومن

 كتر كلام مراتي عليها خليتني غصب عني افكر فيها لدرجة لو مراتي اتوقفت عن الكلام

 عنها كنت بحاول اجيب اي كلام بحيث مراتي تفتح سيرتها وتتكلم عنها وبقى عندي

 فضول ان اشوفها وقولت لنفسي جايز اتغيرت عن الاول وبقت احلى لاني كنت بشوفها

 زمان عادية ومش حلوة لدرجة الجمال المبهر، بدأت مراتي بتعب الولادة والحمدلله ربنا

 اكرمنا بالولد التاني في الوقت ده راحت زوجتي تقعد في بيت اهلها اسبوعين وكنت في

 البيت لوحدي وفجأة لقيت جرس الباب بيرن روحت افتح لقيت بنت قدامي جميلة جدآ

 وانيقة واول ما شافتني انكسفت وعدلت طرحتها وسألتني عن مراتي فرديت عليها هي

 عند اهلها الفترة دي عشان فترة النفاس فأعتذرت وقالت انا نسيت وجريت من قدامي

 وراحت تركب عربيتها وشوية ولقيت جرس الموبايل بيرن عليا برقم غريب لقيت حد

 بيقولي انا اسفة للازعاج وجيت ونسيت ان مراتك مش موجودة ف ممكن لو سمحت ما

 تقولهاش اني جيت وسألت عنها عشان ما تفهمش غلط فوافقت وفعلآ ما قولتش لمراتي

 حاجة قفلت السكة معاها وقعدت افكر فيها وزاد تفكيري لدرجة اني لما روحت لمراتي

 بيت اهلها لقيت وضعها مختلف عن صديقتها تمامآ بقيت اقول لنفسي مراتي اللي كانت

 بتفوح منها ريحة العطور وشكلها الانيق اتحولت للشكل المتبهدل ده .

وطبعآ صديقة مراتي كانت تختلف كتير في شكلها وجمالها واهتمامها بنفسها ولقيت

 نفسي اتعلقت بيها اوي وبدأت تطلع عيوب مراتي وتكرهني فيها لدرجة ان مراتي لما

 خلصت فترة النفاس والمفروض اني اروح اخدها من اهلها وصلت لبيت اهلها وما

 حسيتش اي مشاعر ناحيتها لقيت نفسي من جوايا متغير منها وحسيت اني بحب

 صديقتها جدآ فأنفصلت عن مراتي عشان اتجوزها وتمت الجواز بأسرع مما اتخيل وبعد

 الجواز ابتدت تحكي لي وتقولي انت عارف ان مراتك كانت السبب في طلاقي قالتلي

 كانت بتكلمني عنك كتير لدرجة كرهتني في جوزي وما بقيتش قادرة اكمل معاه وبعد

 فترة ابتديت احس اني اتخدعت لما اتجوزتها وحسيت بالفرق الكبير بينها وبين مراتي

 وسألت نفسي ازاي قدرت تخدعني بكلامها وتصرفاتها وشكلها وفجأة لقيتها مش بتهتم

 بيا ولا بنفسها ولا حتى بترتيب البيت ولومت نفسي كتير وقولت بعد ما كنت عايش حياة

 جميلة ومرتبة اعمل في نفسي كده فأخدت قرار لازم انفصل عنها ازاي اسيب مراتي

 اللي بتحبني وبتهتم بيا وادور على واحدة بالحقد ده وبالغباء ده كله عملت المستحيل ان

 ارجع زوجتي لبيتها مرة واتنين وتلاتة ومراتي رفضت بس مش هيأس لاني بحبها

 برأيكم هل انا السبب في خراب البيت ولا لفت نظري عن طريق مراتي لصديقتها ؟

بقلم / الكاتبة سيدة حسن